म्यानमारलाई ३ सय ३७ रनले पराजित गर्दै नेपाल सेमिफाइनलमा प्रवेश

२८,बिहीबार ०९:०२   Sangita Rai

काठमाडौँ, २८ मंसिर । एसिसी यू–१६ (सोह्र वर्षमुनि) इस्टर्न रिजन क्रिकेट प्रतियोगिता अन्तर्गत बिहिबार भएको समूह चरणको अन्तिम खेलमा नेपालले म्यानमारलाई ३ सय ३७ रनले पराजित गरेको छ ।

थाइल्याण्डमा जारी उक्त प्रतियोगितामा टस जितेर ब्याटिङ गरेको नेपालले ३५.६ ओभरमा विकेट गुमाएर ३ सय ५० रन बनायो । जवाफी ब्याटिङमा उत्रेको म्यानमार ११.३ ओभरमा मात्र १३ रनमा समेटियो । जितसँगै नेपाल समूह विजेता बन्दै सेमिफाइनल प्रवेश गरेको छ ।

म्यानमारलाई सानो योगफलमा समेट्ने क्रममा नेपालका नारायण जोशी र मेखबहादुर सेन थापाले चार/चार विकेट लिए । जोशीले तीन ओभरमा दुई मेडन राखि मात्र एक रन खर्चे ।

थापाले तीन ओभरमा चार रन मात्र दिए । विशाल विक्रम केसीले एक विकेट लिए । ब्याटिङतर्फ म्यानमारका हियन अयुङले सर्वाधिक ३ रन बनाए । नेपालका कप्तान रित गौतम र तृतराज दासले ९९ रनको साझेदारी गरे ।

गौतमले ७८ बलमा १२ चौकाको मद्दतमा अविजित १ सय ६ रन बनाए । दासले २९ बलमा तीन छक्का र सात चौका प्रहार गरी ६४ रन जोडे । विशाल विक्रम केसीले ४२, कुशल मल्लले ३६ तथा सुवास ऐरले १७ रनको योगदान दिए ।

नेपालले यसअघि थाइल्याण्डलाई पहिलो खेलमा १ सय ३३ रनले पराजित गरेको थियो भने दोस्रो खेलमा हङ्कङलाई चार विकेटले हराएको थियो । रासस